Policia ka ndërhyrë me sukses për të parandaluar një ngjarje të rëndë kriminale që mund të kryhej me armë zjarri në qytetin e Sarandës, falë hetimeve të kryera me metoda speciale. Si rezultat, u finalizua operacioni policor i koduar “Knock Out 7”, i cili u zhvillua nga strukturat e Hetimit në Drejtorinë Vendore të Policisë Vlorë dhe Komisariati i Policisë Sarandë.

Gjatë këtij operacioni, u arrestuan dy persona të cilët po trafikonin armë zjarri me qëllim shitjen e tyre. Policia sekuestroi 10 armë zjarri pistoleta tip “Glock”, 150 fishekë luftarak dhe një automjet që po përdorej për transportimin e armëve.

Armët e sekuestruara do të dërgohen në Institutin e Policisë Shkencore për ekzaminime të mëtejshme, me qëllim verifikimin nëse janë përdorur në ngjarje kriminale të mëparshme.