Policia Rrugore e Durrësit ka arrestuar 12 shoferë gjatë një jave, të cilët u kapën duke drejtuar mjetet e tyre nën ndikimin e alkoolit dhe pa leje drejtimi. Gjithashtu, 8 shoferë të tjerë janë proceduar për shkelje të rregullave të qarkullimit. Si pjesë e këtyre kontrolleve, janë pezulluar edhe 5 leje drejtimi dhe janë vendosur gjithsej 554 gjoba.

Policia vendore njoftoi se kontrollet u kryen me përdorimin e mjeteve inteligjente, përfshirë radarët automatikë, dronët e cilësisë së lartë, poliskanët dhe pajisjet drager për matjen e nivelit të alkoolit. Aksioni përfshiu të gjitha akset rrugore kryesore.

Policia apeloi ndaj drejtuesve të mjeteve që të respektojnë rregullat e qarkullimit, duke shmangur përdorimin e celularit gjatë drejtimit të automjetit, duke mos kryer parakalime të gabuara dhe duke moderuar shpejtësinë.

Masat e marra nga Policia Rrugore:
– 58 masa për parakalime të gabuara
– 47 masa për mosvendosjen e rripit të sigurimit
– 25 masa për përdorimin e celularit gjatë drejtimit të mjetit
– 21 masa për mosmbajtjen e kaskës mbrojtëse
– 5 masa për drejtim mjeti nën ndikimin e alkoolit
– 6 masa për mungesë dokumentesh
– 58 masa për parkim të gabuar
– 334 masa për shkelje të tjera të Kodit Rrugor

Policia do të vazhdojë monitorimet për të siguruar një qarkullim të sigurt dhe respektimin e rregullave në rrugët e Durrësit.