Polonia ka aktivizuar një sistem të avancuar mbrojtjeje kundër dronëve, të porositur nga një konsorcium norvegjezo-polak, për të garantuar sigurinë e hapësirës ajrore kombëtare, njoftoi qeveria.

Ministri i Mbrojtjes, Wladyslaw Kosiniak-Kamysz, deklaroi se sistemi “San”, i zhvilluar nga kompania norvegjeze Kongsberg dhe grupi polak i armatimeve PGZ2, përbëhet nga 18 bateri dhe gjithsej 700 mjete. Sipas mediave lokale, vlera e kontratës arrin rreth 3,6 miliardë euro.

Kryeministri Donald Tusk e konsideroi këtë investim një hap vendimtar për ndërtimin e një mbrojtjeje ajrore efektive. Ai rikujtoi incidentin e shtatorit të kaluar, kur një numër i madh dronësh hyri në hapësirën ajrore polake gjatë sulmit rus ndaj Ukrainës, duke detyruar Forcat Ajrore të Polonisë dhe aleatët e NATO-s të rrëzonin disa prej tyre për herë të parë.

Sistemi “San” përfshin një gamë të gjerë armësh, përfshirë mitralozë, raketa, dronë interceptues dhe mjete të tjera për neutralizimin e kërcënimeve ajrore. Ai do të ketë gjithashtu pajisje për bllokimin elektronik të dronëve dhe sisteme radarësh për monitorimin dhe mbrojtjen e hapësirës ajrore.

Ky investim vjen në një moment ku mbrojtja kundër dronëve luftarakë është bërë një prioritet strategjik për vendet e Evropës Qendrore dhe Lindore, duke reflektuar tensionet e rritura në rajon pas pushtimit rus të Ukrainës.