Një tjetër rast kontrabande është goditur nga Policia Kufitare në Portin e Durrësit, në kuadër të operacionit të koduar “Qelqi”. Një 42-vjeçar është arrestuar në flagrancë pasi tentoi të fuste në Shqipëri një sasi vere dhe shampanje të padeklaruar, përmes një kamioni që ai vetë drejtonte.

Shtetasi Shpëtim Gubere, banues në Durrës, u ndalua në hyrje të portit pas një kontrolli të detajuar të ushtruar mbi bazën e analizës së riskut dhe dyshimeve për kontrabandë. Gjatë kontrollit, shërbimet kufitare konstatuan në mjetin e tij arka me verë dhe shampanjë, të cilat nuk ishin të shoqëruara me fatura blerjeje apo dokumentacionin përkatës doganor.

Sipas policisë, mallrat dyshohet se ishin të destinuara për treg në Shqipëri dhe do të futeshin në vend në mënyrë të paligjshme, pa u deklaruar në Pikën e Kalimit Kufitar, në kundërshtim me legjislacionin në fuqi.

Përveç mallrave, u sekuestruan edhe kamioni, pasaporta dhe telefoni celular i të arrestuarit, me qëllim thellimin e hetimeve.

Materialet i janë referuar Prokurorisë së Durrësit, e cila do të vijojë me veprimet e mëtejshme ligjore në lidhje me këtë rast. Policia kufitare njofton se kontrollet do të vijojnë me intensitet të lartë në të gjitha pikat hyrëse dhe dalëse të territorit, në kuadër të luftës kundër kontrabandës dhe informalitetit.