Presidenti i Shteteve të Bashkuara, Joe Biden, deklaroi se vendimi i tij për të mos kandiduar për rizgjedhje ishte “gjëja e duhur për t’u bërë”. Në një bisedë telefonike me ndihmësit e fushatës zgjedhore të Partisë Demokratike, Biden bëri komentet e tij të para që prej tërheqjes nga gara më 21 korrik. Ai shprehu mbështetjen e tij për zëvendëspresidenten Kamala Harris, e cila tani duhet të sigurojë nominimin e partisë si kandidate për presidente.

“E di që lajmi për tërheqjen time ishte befasues dhe i vështirë për t’u dëgjuar, por ishte gjëja e duhur për t’u bërë“, u tha Biden përfaqësuesve të fushatës. Ai vlerësoi punën e ekipit të tij që ka punuar “me shpirt” për ta ndihmuar atë të qëndronte në detyrë për një mandat të dytë, por shtoi se “nuk do të shkojë askund” dhe se do të mbetet “plotësisht i angazhuar” në fushatë.

“Shpresoj që ju t’i jepni Kamalës një pjesë të zemrës dhe shpirtit tuaj, që ma keni dhënë mua“, u tha Biden përfaqësuesve të fushatës. “Ne ende duhet ta shpëtojmë këtë demokraci. Trump paraqet ende rrezik për këtë komb”, tha Biden duke iu referuar kandidatit republikan për president, Donald Trump. Zgjedhjet presidenciale në SHBA do të mbahen më 5 nëntor. Biden, 81 vjeç, u tërhoq pas shqetësimeve në rritje për moshën dhe shëndetin e tij.