Presidenti i Federatës së Futbollit të Serbisë, Dragan Xhajiç, ka reaguar për herë të parë pas humbjes së kombëtares serbe ndaj Shqipërisë më 11 tetor në Leskovc, një disfatë që ndikoi rëndë në garën për kualifikim.

Në një intervistë për mediat serbe, Xhajiç e cilësoi rezultatin si një “dështim kolosal” dhe konfirmoi se Federata po kërkon një trajner të ri pas dorëheqjes së Dragan Stojkoviç – Piksi.

“Ishte një dështim! Një dështim kolosal! Nuk ka diskutim. Nuk e di çfarë humbisnim… Për një milion arsye, ne mund dhe duhej të bënim më mirë,” deklaroi ai.

Xhajiç shtoi se lojtarët duhet të tregojnë përkushtim maksimal në ndeshjet e ardhshme kundër Anglisë dhe Letonisë, edhe pse shanset për play-off janë minimale.

“Të gjithë që do të veshin fanellën e kombëtares në nëntor, duhet të japin gjithçka në fushë, pavarësisht situatës. Kjo është detyra e tyre ndaj tifozëve dhe kombit,” përfundoi presidenti i FSS-së.