Presidenti i Republikës së Shqipërisë, Bajram Begaj, përshëndeti sot (15 Tetor) hapjen e grup-kapitullit të parë të negociatave për anëtarësimin e Shqipërisë në Bashkimin Evropian, gjatë Konferencës së Dytë Ndërqeveritare Shqipëri-BE.

Kreu i shtetit vlerësoi këtë moment si një lajm të mirë për shqiptarët, në përmbushje të aspiratës së tyre për të qenë pjesë e bllokut evropian.

Në profilin e tij zyrtar në rrjetet sociale, Presidenti Bajram Begaj shkroi:

“Lajmi që Shqipëria hap kapitullin e reformave themelore të negociatave për anëtarësim të plotë në BE mbush me shpresë çdo shqiptar në realizimin e ëndrrës së kahershme ‘E duam Shqipërinë si gjithë Evropa’. Tani ne kemi në dorë ritmin e këtij rrugëtimi. Jam shpresëplotë për progresin dhe suksesin!”

Kjo ngjarje përbën një hap të rëndësishëm për Shqipërinë në rrugën e saj drejt integrimit të plotë në Bashkimin Evropian.