Presidentja e Kosovës, Vjosa Osmani, gjatë një takimi me ish-kryeministrin britanik Tony Blair, i bëri një dhuratë të veçantë nga familja Rugova. Në disa pamje të postuara nga Osmani në Instagram, ajo shihet teksa i dhuroi Blair gurët e Trepçës. Gjatë takimit në Presidencë, Blair gjithashtu nënshkroi librin e miqësisë.

“Një gur kristali për mikun e madh të Kosovës Tony Blair, për të vazhduar traditën e Presidentit Historik Dr. Ibrahim Rugova. Faleminderit familjes Rugova për përzgjedhjen dhe dhurimin e gurit,” ka shkruar Osmani në Facebook.

Tony Blair po qëndron në Kosovë në kuadër të aktiviteteve që shënojnë 25-vjetorin e çlirimit të Kosovës. Gjatë vizitës së tij, përveç takimit me Presidenten Osmani, Blair u takua edhe me kryeministrin Albin Kurti dhe kryeparlamentarin Glauk Konjufca.