Prokuroria e Apelit ka shpallur pretencën për dy mjekët e përfshirë në rastin e vdekjes së Doriana Hakës, bashkëshortes së portierit të Partizanit, Alban Hoxha, e cila ndërroi jetë nëntorin e 2014, dy javë pas lindjes së fëmijës së saj të parë.

Sipas prokurorisë, për gjinekologun Petrit Rexhepi kërkohet dënim me 9 muaj burgim, por ekzekutimi i vendimit do të pezullohet për shkak të moshës mbi 70 vjeç, duke e vendosur në shërbim prove për 18 muaj. Gjatë kësaj periudhe ai duhet të mbajë kontakte me shërbimin e provës dhe të mos kryejë asnjë vepër penale. Po ashtu, Rexhepit i propozohet pezullimi i licencës për 5 vite, duke e privuar nga ushtrimi i profesionit.

Ndërsa për Elona Burbën, reanimatore, prokuroria ka kërkuar 1 vit burgim dhe heqjen e licencës për 5 vite.

Seanca e radhës është caktuar më 10 nëntor, ku mjekët do të paraqesin argumentet e tyre të mbrojtjes. Familja e Doriana Hakës, pas më shumë se një dekade betejë në dyert e drejtësisë, pret me padurim vendimin përfundimtar, duke akuzuar mjekët si përgjegjës për humbjen e jetës së të afërmes së tyre.