Një 30-vjeçar në Ksamil është proceduar penalisht pasi ushtrohej pa licencë në aktivitetin e këmbimit valutor dhe nuk lëshonte kupona tatimorë. Po ashtu, ai kishte punësuar punonjës të pasiguruar. 30-vjeçari, i cili është administrator i këtij subjekti, është ndaluar nga policia.
Gjatë kontrollit në subjektin e administruar nga 30-vjeçari, u sekuestruan si prova materiale 98,896 lekë, 368 euro, 26 paund dhe 2 laptopë. Materialet janë dërguar në Prokurori për veprime të mëtejshme hetimore.
Ngjarja lidhet me një incident të ndodhur më datë 17.08.2024, ku një 26-vjeçar u arrestua nga Oficerët e Policisë Gjyqësore pranë Prokurorisë Sarandë, pasi kundërshtoi me dhunë punonjësit e qarkullimit rrugor të Sarandës gjatë përpilimit të procesverbalit të një shkeljeje rrugore (parkim i gabuar) në rrugën “Butrinti”, përballë një subjekti privat të administruar nga vëllai i tij. Pas këtij incidenti, shërbimet e Komisariatit të Policisë Sarandë, falë informacionit të marrë nga qytetarët, zbuluan se në këtë subjekt ushtrohej aktiviteti i këmbimit valutor pa licencë.
Gjatë kontrollit të kryer, u konstatua se shtetasi D. M., administrator i subjektit, ushtronte aktivitetin e këmbimit valutor pa licencë dhe nuk lëshonte kupona tatimorë për shërbimet e ofruara, si dhe kishte punonjës të pasiguruar. Seksioni për Hetimin e Krimit Ekonomik e Financiar ka referuar materialet në Prokurori dhe ka nisur procedimin penal për shtetasin D. M., 30 vjeç, banues në Ksamil.
