Kryeministri Edi Rama njoftoi sot (9 shtator) një projekt të ri ambicioz që përfshin monitorimin e rreptë të rrugëve dhe shkollave në Shqipëri, gjatë një vizite në shkollën “Babë Dudë Karbunara” në Berat, një prej 25 shkollave të reja që u hapën sot në mbarë vendin.

Në fjalën e tij, Rama theksoi rëndësinë e rritjes së sigurisë në shkolla, duke nënvizuar se projekti i ri do të bëjë një “kapërcim epokal” në monitorimin e sigurisë nëpër rrugë, qytete dhe shkolla, duke përfshirë edhe mbikëqyrjen e qelizave të brendshme të shkollave. Ky monitorim synon të sigurojë qetësinë e prindërve, fëmijëve dhe drejtuesve të shkollave, duke krijuar një mjedis të sigurt jo vetëm kundër fenomeneve kriminale apo ndërhyrjeve të jashtme, por edhe kundër bullizmit, kopjeve, braktisjes së mësimit dhe mungesës së respektit ndaj mësuesve.

Një tjetër lajm i rëndësishëm që Rama ndau ishte mundësia e punësimit me kohë të pjesshme të mësuesve pensionistë. Ky iniciativë synon të lehtësojë tregun e punës dhe të ndihmojë në mbikëqyrjen dhe zhvillimin e nxënësve, veçanërisht në sistemin dual që po thellohet në vend. Mësuesit pensionistë do të angazhohen në përkujdesje të veçantë dhe mbikëqyrje, duke kontribuar në procesin e edukimit të nxënësve profesionalë në ndërmarrje.

Në përfundim, Kryeministri theksoi një tjetër prioritet të qeverisë: mbrojtjen e gjuhës shqipe, e cila po kërcënohet nga komunikimet e shpejta dhe braktisja e leximit dhe shkrimit me dorë. Ai shprehu shqetësimin për sfidat që po përballet gjuha shqipe dhe premtoi përpjekje të mëdha për të rritur kapacitetet e mësimdhënies, si në aspektin e teknologjisë dhe digjitalizimit, ashtu edhe në aspektin e mbrojtjes së gjuhës shqipe. Rama nënvizoi se do të krijohet një rrjet mbrojtës për të siguruar ruajtjen dhe zhvillimin e mëtejshëm të gjuhës shqipe.