Një grua 30-vjeçare u përball me një rrezik të madh për shëndetin e saj pasi aksidentalisht gëlltiti një gjilpërë, njoftoi Shërbimi Spitalor Klinik dhe Universitar i Kosovës (ShSKUK). Gjilpëra kishte depërtuar në rrugët e frymëmarrjes, duke shkaktuar vështirësi të mëdha në frymëmarrje dhe duke rrezikuar seriozisht jetën e pacientes.
Ekipi kujdestar i Klinikës së Pulmologjisë reagoi menjëherë pas vlerësimit të gjendjes së pacientes. Përmes aparaturës së bronkoskopisë, ata arritën të largojnë gjilpërën, e cila kishte shkaktuar pengesa dhe vështirësi të konsiderueshme në frymëmarrjen e saj.
Pas këtij incidenti, mjekët e Klinikës së Pulmologjisë apeluan tek qytetarët që të jenë më të kujdesshëm për të shmangur rreziqe të ngjashme që mund të vënë shëndetin në rrezik.
