Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar për gjykim shtetasit E.H. dhe A.H. për akuzën e “Pastrimit të produkteve të veprës penale ose veprimtarisë kriminale”, sipas nenit 287 të Kodit Penal.

Procedimi penal, i regjistruar në vitin 2023 mbi bazën e të dhënave të mbledhura në një procedim tjetër penal që përfshin të njëjtët të pandehur për vepra penale në fushën e narkotikëve, ka zbuluar se ata nuk kanë pasur burime të ligjshme për të justifikuar pasurinë e tyre prej 40.800 Euro dhe 3.000 USD, të sekuestruara në banesën e tyre. Në të njëjtën datë, autoritetet sekuestruan edhe një sasi të konsiderueshme lënde narkotike dhe zbuluan bimë narkotike të kultivuara në pronën e tyre.

E.H. dhe A.H. akuzohen se në bashkëpunim me njëri-tjetrin kanë fshehur ose mbuluar natyrën dhe burimin e pronësisë ose të drejtave mbi pasuritë, duke qenë të vetëdijshëm se këto pasuri ishin produkte të veprimtarive kriminale. Gjatë hetimeve, organi i akuzës ka kryer një verifikim të plotë të veprimeve ekonomike dhe juridike të tyre, duke përfshirë edhe personat e lidhur me ta, për të identifikuar pasuritë dhe për të verifikuar burimet e ligjshme të tyre.

Rezultatet e hetimit treguan se pasuria e zotëruar nga të pandehurit, e cila përfshin 6 automjete dhe një sasi të parave cash prej 8.778.866 lekësh, nuk justifikohet nga burime të ligjshme të ardhurash. Prokuroria konkludoi se këto pasuri nuk përligjen me të ardhurat apo fitimet nga veprimtaritë e ligjshme të deklaruara nga të pandehurit dhe familjarët e tyre.