Prokuroria e Tiranës ka përfunduar hetimet dhe ka dërguar për gjykim Renato Bodurrin, të njohur si pjesëtar i bandës Çopja, për veprën penale “Goditje për shkak të detyrës” në bashkëpunim. Ai akuzohet për sulmin ndaj gazetarit dhe administratorit të portalit të lajmeve “Pamfleti”, Gjergj Zefi.

Sipas Prokurorisë, Bodurri, në bashkëpunim me persona ende të paidentifikuar, ka ushtruar dhunë fizike ndaj Zefit, duke e goditur me shkop në kokë, krah, buzë dhe këmbë. Viktima u paraqit në Spitalin e Traumës me dëmtime të shumta, ndërsa fillimisht nuk mbante mend detaje të sulmit.

Hetimet nisën pas referimeve të Komisariatit të Policisë nr. 3. Pamjet filmike dhe dëshmitë treguan se disa persona e kanë goditur gazetarin dhe më pas janë larguar me shpejtësi me një makinë të zezë. Bazuar në këto prova, Prokuroria ka ngritur akuzën ndaj Bodurrit dhe e ka çuar çështjen në Gjykatën e Shkallës së Parë të Juridiksionit të Përgjithshëm, Tiranë.

Hetimet vijojnë për identifikimin e bashkëpunëtorëve të tij.