Një ngjarje e rëndë ka ndodhur këtë të hënë në fshatin Stanovc të Vushtrrisë, ku pronari i një furre buke ka vrarë një punonjëse të tij dhe më pas ka kryer vetëvrasje.
Sipas deklaratës së Zëdhënësit të Policisë së Kosovës për rajonin e Mitrovicës, Avni Zahiti, ngjarja ka ndodhur rreth orës 14:56. Hetimet fillestare tregojnë se dorasi 58-vjeçar, me inicialet A.M., ka qëlluar për vdekje një grua 42-vjeçare, me inicialet N.H., dhe më pas ka vrarë veten.
Në vendin e ngjarjes është gjetur dhe konfiskuar një armë pistoletë, ndërsa trupat e pajetë janë dërguar në Institutin e Mjekësisë Ligjore për obduksion, me urdhër të prokurorit.
Hetimet për këtë “Vrasje të rëndë” dhe “Vetëvrasje” po vazhdojnë nga hetuesit policorë nën udhëheqjen e prokurorisë.
Një ngjarje që ka tronditur qytetarët
Ngjarja ka shkaktuar tronditje të madhe në komunitet, ndërsa bashkëshorti i viktimës, i cili mbërriti në vendngjarje, është parë duke vënë duart në kokë nga dhimbja e humbjes së gruas së tij.
Ngjarja e dytë e rëndë brenda 24 orëve në Vushtrri
Ky është rasti i dytë i një vrasjeje në Vushtrri brenda 24 orëve, pasi një ditë më parë një 19-vjeçar u vra nga një bashkëmoshatar, duke rritur ndjeshëm shqetësimin për sigurinë në këtë zonë.
