Protesta e opozitës në Tiranë: Bllokime, tensione dhe përplasje me qytetarët

Tubimi i organizuar nga opozita këtë të martë ka nisur me tensione dhe përplasje të lehta në disa zona të kryeqytetit, përfshirë Rrethrrotullimin e Zogut të Zi, një nga pikat kryesore ku janë përqendruar protestuesit dhe forcat e shumta policore.

Një moment i veçantë gjatë protestës ndodhi kur një shofer furgoni, duke kaluar pranë zonës së protestës, ngriti dy gishtat në shenjë mbështetjeje ndaj opozitës dhe protestës së tyre. Megjithatë, disa protestues iu drejtuan me ironi duke i thënë:
“Po të ishe me ne, do të vije këtu.”

Bllokimi i rrugëve kryesore
Protesta, e paralajmëruar prej ditësh, ka për qëllim të bllokojë disa nga akset kryesore të Tiranës, përfshirë zonën e Zogut të Zi, me synimin për të dërguar një mesazh të fuqishëm ndaj qeverisë. Nga pamjet e bëra publike, duket se qytetarë të ndryshëm po kalojnë mes protestës dhe bllokimit të rrugëve, ndërsa prania e madhe e policisë është përqendruar për të menaxhuar situatën dhe për të shmangur përshkallëzimin e tensioneve.

Opozita synon që, përmes këtij tubimi dhe bllokimeve simbolike të rrugëve, të shprehë kundërshtimin e saj ndaj politikave aktuale të qeverisë dhe të kërkojë ndryshime të rëndësishme politike, përfshirë qeveri teknike për zgjedhjet e ardhshme dhe lirimin e liderëve të saj që ndodhen nën masa ligjore.