Deputetja e Partisë Demokratike, Ina Zhupa, ka deklaruar se protesta e sotme është një dëshmi e pakënaqësisë së qytetarëve ndaj qeverisë dhe një sinjal i qartë për ndryshimin që pritet më 11 Maj.

“Ne jemi në krah të qytetarëve. Sot do të jetë një nga protestat më të fuqishme të PD-së, një mënyrë për të treguar se qytetarët nuk do të dorëzohen dhe do të rezistojnë.” – tha Zhupa.

Ajo theksoi se opozita është e bashkuar në këtë protestë, por janë qytetarët ata që vendosin.

“Qytetarët janë ata që kanë irritimin më të madh ndaj vjedhjeve që u bëhen. Ne jemi aty për t’i mbështetur, për të folur me ta dhe për të dëgjuar mesazhet e tyre, por skenarin final e vendos qytetari.”

Ndërkohë, drejtuesi politik i PD-së për Tiranën, Belind Këlliçi, nënvizoi situatën e rënduar ekonomike dhe tha se Shqipëria po përballet me një krizë të thellë demografike dhe financiare.

“Shqipëria përveçse është plakur, edhe është mpakur. Ekonomia e shqiptarëve është sot në ditën më të zezë.”

Ai përmendi edhe aferën e Tunelit të Llogarasë, ku sipas tij, janë shpërdoruar 50 milionë euro, dhe përsëriti premtimet e PD-së për rritjen e pagave.

📢 “Ne kemi premtuar pagë minimale 500 euro dhe mesatare 1200 euro.”

Sipas PD-së, protesta synon të tregojë forcën e qytetarëve dhe vendosmërinë e opozitës për të kundërshtuar keqqeverisjen.

🔥 “Qytetarët sot duhet të protestojnë që të kuptohet se gjithçka që bëhet në kurriz të tyre nuk mbetet pa u ndëshkuar. Ata do të tregojnë se nuk tremben më!” – përfundoi Zhupa.