Pas gjyqtarëve, prokurorëve e punonjësve të Policisë, tashmë vetingut do t’i nënshtrohen edhe noterët. Projektligji u miratua dje në Komisionin e Ligjeve vetëm me votat e maxhorancës.

Ministri i Drejtësisë, i cili do të bëjë edhe vetingun e noterëve pasi ligji të hyjë në fuqi, ishte dje para deputetëve dhe shpjegoi risitë e projektligjit. “Janë rregulluar 4 çështje kryesore që lidhen me integritetin dhe besueshmërinë profesionale, me shkeljet disiplinore jashtë ushtrimit të profesionit, me përfshirjen në listën e personave të shpallur sipas legjislacionit për masat kundër financimit të terrorizimit, si dhe e katërta, lidhur me kërkesën e autoritetet përgjegjës për revokimin e licencës së noterit në përputhje me legjislacionin në fuqi për parandalimin e pastrimit të parave dhe financimit të terrorizmit. Lidhur me integritetin dhe besueshmërinë, ky koncept i parashikuar në këto ndryshime siguron që të përjashtohet mundësia që të futen në profesionin e noterit ata persona me kontakte të papërshtatshme me personat e përfshirë në krimin e organizuar apo ata me vepra penale. Ligji i noterisë pavarësisht se është një ligj i ri, nuk parashikonte asnjë instrument që të pengonte bashkëpunëtorët e kriminelëve në profesionin e noterit. Këto ndryshime vlejnë për kandidatët për noter që do të pranohen në shërbimin noterial sipas ligjit të 2018”, tha ministri Manja.

Projektligji u kundërshtua nga deputetët e opozitës. Nënkryetarja e Komisionit të Ligjeve, Dhurata Çupi, u shpreh se Ministria nuk ka marrë parasysh në hartimin e ligjit rekomandimet që ka bërë Dhoma Kombëtare e Noterisë dhe OPDAT-i. Ndërkohë, u shpreh se me këtë projektligj synohet që të futet klientelizmi edhe te noterët.