Socialistët nuk do të humbasin asnjë ditë kohë. Java e ardhshme pritet të jetë ndër më të ngjeshurat në Kuvend, ku mazhoranca do të miratojë rregulloren e re parlamentare, do të ristrukturojë komisionet dhe do të zyrtarizojë qeverinë e re.

Të hënën, kryetari i Kuvendit Niko Peleshi do të mbledhë kryetarët e grupeve parlamentare për të përcaktuar emrat në kryesitë dhe anëtarësinë e komisioneve, si dhe përbërjen e Byrosë dhe delegacioneve parlamentare.

E marta nis me mbledhjen e Këshillit për Rregulloren dhe Mandatet, që do të shqyrtojë draftin e ri të paralajmëruar nga kryeministri Edi Rama. Po atë ditë, pasdite, seanca plenare do të votojë me procedurë të përshpejtuar Rregulloren dhe përbërjen e re të komisioneve.

Të mërkurën, Konferenca e Kryetarëve do të vendosë kohën e debatit për programin qeverisës dhe kabinetin e ri. Ndërsa të enjten, Kuvendi do të zhvillojë një debat maratonë mes mazhorancës dhe opozitës, ku Rama do të prezantojë programin e PS-së për katër vitet e ardhshme dhe listën me 17 ministrat e rinj.

Pas diskutimeve, pritet votimi i programit dhe kabinetit. E gjithë java mbyllet të premten, kur pas votimit, qeveria e re do të bëjë betimin zyrtar para Presidentit Bajram Begaj.

Në kuadër të ristrukturimit, numri i komisioneve parlamentare do të rritet nga 8 në 11. Shtatë prej tyre do të drejtohen nga Partia Socialiste dhe katër nga Partia Demokratike.