Një aksident i rëndë ka ndodhur rreth mesditës së kësaj të enjteje në afërsi të fshatit Hadroj në Pukë. Autoritetet bëjnë të ditur se për shkak të lagështirës, një automjet ka dalë nga rruga dhe ka përfunduar në ujërat e lumit Fan.
Policia ka ndërhyrë menjëherë dhe ka mundësuar nxjerrjen e dy shtetasve nga makina. Ata janë dërguar me urgjencë në spital, ku po marrin kujdesin mjekësor. Në këtë moment, ata janë jashtë rrezikut për jetën.
Njoftimi i policisë:
Pukë/Informacion paraprak
Rreth orës 12:15, në fshatin Hadroj, dyshohet se për shkak të lagështirës nga shirat, ka dalë nga rruga dhe ka rënë në ujërat e lumit Fan, automjeti me drejtues shtetasin Z. N., 60 vjeç dhe ku ishte pasagjer, djali i tij, shtetasi N. N., 24 vjeç.
Shërbimet e Policisë kanë shkuar menjëherë në vendin e aksidentit, ku kanë bërë të mundur nxjerrjen e 2 shtetasve. Ata janë transportuar në spitalin e Pukës, ku po marrin ndihmë mjekësore dhe janë jashtë rrezikut për jetën.
Grupi hetimor vijon të punojë për të zbardhur shkakun e aksidentit.
