Qeveria gjermane ka reaguar ashpër ndaj Elon Musk, duke e akuzuar atë se po përpiqet të ndikojë në zgjedhjet federale të vendit përmes mbështetjes së tij të përsëritur ndaj partisë së ekstremit të djathtë AfD (Alternativa për Gjermaninë).

Zëdhënësja e qeverisë, Christiane Hoffmann, deklaroi në një konferencë për shtyp se postimet e Musk në rrjetin social ‘X’ dhe opinioni i tij i fundit publik në mbështetje të AfD-së janë një përpjekje për të ndikuar në proceset demokratike në Gjermani.

“Elon Musk ka të drejtën e tij për lirinë e fjalës,” tha Hoffmann, por shtoi me ironi: “Në fund të fundit, liria e mendimit mbulon edhe marrëzitë më të mëdha.”

Partia AfD njihet për qëndrimet e saj të ashpra anti-emigracion dhe anti-myslimane, të cilat kanë shkaktuar polemika të shumta në skenën politike gjermane. Komentet dhe mbështetja publike nga një figurë me ndikim global si Elon Musk kanë ngritur shqetësime serioze në qeverinë gjermane për ndërhyrje të mundshme në politikën e brendshme të vendit.

Situata pritet të zhvillohet më tej ndërsa fushata zgjedhore intensifikohet.

Musk shpesh ka ndërhyrë në politikën gjermane, madje duke e quajtur kancelarin, Olaf Scholz, një “budalla”. Megjithatë, thirrjet e tij më të fundit për votuesit gjermanë që të mbështesin AfD-në, të cilën autoritetet federale e klasifikojnë si një parti e dyshuar ekstremiste, kanë shkaktuar zemërim dhe akuza për ndërhyrje shqetësuese në zgjedhjet e vendit që ka ekonominë kryesore të Evropës.

Sipërmarrësi me origjinë nga Afrika e Jugut, i cili është emëruar nga Donald Trump për të bashkëdrejtuar një komision që synon të zvogëlojë shpenzimet e qeverisë federale në SHBA, shkroi në X në fillim të këtij muaji: “Vetëm AfD mund ta shpëtojë Gjermaninë”.

Në postim, ai ndau një video nga një ndikuese e djathtë gjermane, Naomi Seibt, e cila kritikoi Friedrich Merz, kryesuesin konservator në zgjedhjet gjermane, dhe vlerësoi Javier Milei, presidentin e vetëquajtur “anarko-kapitalist” të Argjentinës.

Në fundjavë, me një editorial në botuar në Welt am Sonntag, Musk, duke argumentuar se Gjermania po shkonte në prag të kolapsit ekonomik dhe kulturor, mbronte AfD-në dhe vlerësonte qasjen e saj ndaj ekonomisë, duke përfshirë rregulloren dhe politikën e taksave.