Deputeti i Partisë Demokratike, Belind Këlliçi, ngriti sot shqetësimin për rritjen e aktivitetit të call centerave mashtrues dhe për “kanabizimin” e vendit, duke akuzuar qeverinë për inaktivitet dhe mungesë kontrolli.

Nga foltorja e Kuvendit, Këlliçi u shpreh:

“Pas kanabizimit masiv të vendit, trafikut të drogave të forta, konsolidimit dhe forcimit të grupeve dhe familjeve kriminale me bekimin e qeverisë, Shqipëria është vendi i preferuar për call centerat mashtrues. Ky është një biznes i mirëfilltë që vijon pa u ndalur, pavarësisht denoncimeve nga institucionet vendase e të huaja dhe emisionet investigative si Le Iene në Itali apo Piranja në Shqipëri.”

Deputeti ngriti shqetësimin edhe për licensimin e një banke online në vend, Jet Bank, dhe lidhjet e mundshme të themeluesve Idan Avishai dhe Saniel Sanilevich me platformat Forex, duke theksuar se Banka e Shqipërisë nuk ka dhënë përgjigje të qartë për të gjitha pyetjet e tij:

“Banka e Shqipërisë ka konfirmuar se ka dhënë miratimin paraprak për licensimin e Jet Bank, por shmang pyetjen nëse themeluesit kanë lidhje me platformat Forex. Pra, ose nuk e kupton kërkesën, ose qëllimisht keqinformon publikun dhe parlamentin.”

Këlliçi ftoi ekspertët dhe qytetarët të bëhen pjesë e këtij debati, ndërsa kritikoi qeverinë dhe agjencitë ligjzbatuese:

“Sa për qeverinë dhe agjencitë e zbatimit të ligjit, sigurisht nuk kam shpresë se do të bëjnë detyrën e tyre. Nëse ka paligjshmëri dhe biznes kriminal, dihet se i pari që ka mbyllur një sy apo e ka dhënë bekimin, është vetë kryeministri Edi Rama.”