Nga dita e sotme, qytetarët e Shqipërisë me pasaporta të rregullta mund të udhëtojnë drejt Azerbajxhanit pa pasur nevojë për vizë. Ambasadori i Azerbajxhanit në Shqipëri, Anar Huseynov, njoftoi këtë lehtësim të udhëtimit përmes një postimi në rrjetin social “X”.
Marrëveshja për heqjen e vizave u nënshkrua më 1 mars 2024 në prani të Kryeministrit Edi Rama nga Besart Kadia, zëvendësministri për Europën dhe Punët e Jashtme, dhe Fariz Rzayev, zëvendësministër i Punëve të Jashtme të Azerbajxhanit. Kjo marrëveshje erdhi në kuadër të vizitës së Kryeministrit Rama në Azerbajxhan në fillim të muajit mars, ku u zhvilluan një sërë takimesh të rëndësishme për të hapur mundësi të reja për turizëm, zhvillim ekonomik dhe bashkëpunim mes dy vendeve.
Një tjetër përparim i rëndësishëm në marrëdhëniet dypalëshe u shënua me vizitën e Komitetit të Përbashkët Shqipëri-Azerbajxhan këtë javë në Baku. Gjatë takimit u diskutuan mundësitë e bashkëpunimit në sektorë të ndryshëm, si turizmi, shëndetësia, arsimi dhe digjitalizimi, dhe u konfirmua angazhimi për rezultate konkrete në fushat e evidentuara.
Gjithashtu, u diskutua edhe projekti pilot i gazifikimit të Korçës dhe mundësia e pjesëmarrjes së kompanive nga të dy vendet në projekte të energjisë së rinovueshme. Heqja e vizave është një hap i madh për zhvillimin ekonomik dhe bashkëpunimin mes Shqipërisë dhe Azerbajxhanit, marrëdhëniet e të cilave kanë përjetuar një zhvillim të rëndësishëm vitin e fundit me hapjen e ambasadës së Azerbajxhanit në Tiranë dhe ambasadës së Shqipërisë në Baku që pritet të hapet këtë vjeshtë.
