Kreu i Partisë Demokratike, Sali Berisha, foli nga selia blu për incidentin ku protestuesit opozitarë hodhën molotovë dhe fishekzjarrë mbi ish-vilën e diktatorit Enver Hoxha. Ai argumentoi se qytetarët u mashtruan nga agjentë të infiltruar të policisë kriminale, të cilët i bindën se në vilë banonte kryeministri Edi Rama.

“Qytetarë dhe qytetare, në marshim e sipër, agjentë të infiltruar të policisë kriminale mashtruan kryengritësit se në shtëpinë e ish-diktatorit banon Edi Rama. Kjo ngjalli një revoltë të pakufishme dhe bëri që ata t’i përvishen asaj banese,” tha Berisha, duke theksuar se veprimi i protestuesve ishte një shpërthim urrejtjeje ndaj kryeministrit dhe jo ndaj ndërtesave.

Ai shtoi se Edi Rama nuk banonte në atë adresë, por tek vila e Mehmet Shehut, duke nënvizuar se asnjë infiltrim i mundshëm nuk mund të devijojë protestat në mënyrë të qëllimshme. Deklarata e Berishës vjen pas një ngjarjeje që ka shkaktuar debate dhe reagime të forta në opinionin publik.