Turistët që vizitojnë qytetin e njohur portugez të Albufeira mund të ndalohen të veshin rroba plazhi në rrugë, duke përfshirë bikini, nga vera e ardhshme. Një projektvendim që po diskutohet tani në qytet parashikon një gjobë prej 1300 eurosh për ata që shkelin këtë rregull.

Qyteti, i njohur për turizmin britanik, ka rishikuar kodin e tij të sjelljes dhe tani ka ndaluar eksplicitisht turistët që të jenë pjesërisht ose plotësisht nudo në hapësira publike. Ky ndryshim është nxitur nga incidenti i vitit të kaluar, kur tetë britanikë u filmuan duke kërcyer lakuriq në një bar në mes të ditës në qendër të Albufeira.

Kryetari i qytetit, José Carlos Rollo, ka deklaruar se ndalimi ka për qëllim ruajtjen e Albufeira si një destinacion turistik të sigurt dhe miqësor për familjet. Sipas propozimit, do të vendosen gjoba për ata që shkelin rregullat, duke përfshirë ndalimin e marrëdhënieve seksuale në publik, si dhe rregullat për tarracat që mund të shihen nga hapësirat publike.

Albufeira i bashkohet qyteteve të tjera turistike si Barcelona, Nisa dhe Dubrovniku, të cilat kanë miratuar ligje të ngjashme për të ndaluar sjelljet nudo në hapësira publike.