Kryeministri Edi Rama në fjalën e mbajtur në Kuvend iu përgjigj kryetarit të grupit parlamentar të PD-së Enkeled Alibeaj duke i thënë se ai me siguri banon në ndonjë planet tjetër përderisa shtron pyetje retorike sa i takon krizës.

Alibeaj tha se si është e mundur që Shqipëria të quhet europiane me këto lloj çmimesh, e ndërsa kreu i qeverisë iu përgjigj duke thënë se kjo situatë është globale e madje dhe shifrat e Eurostat tregojnë se vendi ynë ka mbajtur inflacionin në nivelet më të ulëta në rajon.

Rama: Nuk mund të miratojmë paketa afatshkurtra për krizën.

Parafolësi ngriti shumë pyetje retorike, çfarë europiane ka sot në vend kur çmimet rriten. Jam i bindur që nuk jetoni këtu, banoni në ndonjë planet tjetër, emri i të cilit mbetet mister. Nëse ka diçka që po shqetëson jo vetëm Europën por mbarë botën është rritja e çmimeve dhe është situatë në të cilën shifrat e Eurostat tregojnë se Shqipëria e ka mbajtur inflacionin në një nivel që është më i ulëti në rajon.

Mbulesa e garantuar deri më tani për të mos lejuar që në faturat të shfaqet çmimi real është 330 milionë euro të shpenzuara nga kompania e energjisë dhe shteti.