Kryeministri Edi Rama zhvilloi sot një takim me furnizuesit e naftës, ku diskutoi mbi pasojat e konfliktit në Lindjen e Mesme dhe situatën në tregun e brendshëm të karburanteve.

Rama vlerësoi qasjen e përgjegjshme të operatorëve dhe theksoi se, pavarësisht rritjes së fortë të çmimeve në bursat ndërkombëtare, në Shqipëri çmimi është rritur në mënyrë më të moderuar. Ai njoftoi gjithashtu se vendi ka rezervë të mjaftueshme karburanti dhe po monitorohet situata globalisht.

“Sfida është e hapur, nuk di të thotë askush kur do të mbyllet kjo betejë që mban çmimin e naftës. Nuk dihet sesi do shkojë çmimi në bursë, por do bëjmë atë që na takon. Kemi një rezervë të arsyeshme, e cila fizikisht është aty dhe mbetet për t’u monitoruar gjithë situata”, tha kryeministri.

Ai shtoi se qeveria po finalizon një ligj të ri mbi rezervat shtetërore dhe po punon për krijimin e një distributori shtetëror në tregun e karburanteve, duke synuar mbrojtjen e konsumatorëve dhe stabilitetin e tregut.