Mynih – Kryeministri Edi Rama, në fjalën e tij gjatë Konferencës së Mynihut, e cilësoi zgjedhjen e Donald Trump si president të SHBA-së si një akt bujar ndaj Bashkimit Europian, duke e parë atë si një mundësi për Europën që të zgjohet dhe të reflektojë mbi sfidat e saj.

“Zgjedhja e Donald Trump është akti më bujar i Zotit kundrejt Bashkimit Europian për t’i dhënë një shans shumë të madh Europës të zgjohet,“ – tha Rama, duke shtuar se kontinenti duhet të mësojë të bashkëjetojë me partnerë që mund të kenë parime të ndryshme.

Kryeministri shqiptar theksoi se Europa duhet të fokusohet më shumë tek fuqia dhe konkurrenca, pasi nëse nuk arrin të konkurrojë, nuk do të jetë në gjendje të përballojë sfidat globale.

Duke folur për marrëdhëniet ndërkombëtare, Rama u shpreh se BE-ja nuk duhet të vendosë kushtëzime për të pasur miq në botë, por të krijojë aleanca edhe me ata që mund të kenë vlera të ndryshme.

Në fund të fjalës së tij, ai veçoi Ballkanin Perëndimor si një rajon me potencial të madh për investime, duke e konsideruar atë një faktor kyç në zhvillimin ekonomik dhe politik të Europës.