Kryeministri Edi Rama deklaroi sot nga Londra, ku merr pjesë në panelin e Chatham House me temën “Ballkani Perëndimor dhe Bashkimi Europian”, se për të qenë e suksesshme, Kosova duhet të fokusohet te dialogu me BE-në dhe jo te marrëdhënia me Serbinë.
Mesazhi kryesor i Ramës për Kosovën
Rama theksoi se Kosova është një shtet i ri demokratik, i njohur nga shumica e fuqive të mëdha, dhe se sfida kryesore për të është konsolidimi i pozicionit në botën demokratike dhe në BE.
“Kosova është republikë, një shtet i ri demokratik i njohur nga fuqitë e mëdha dhe ende jo i njohur nga pesë vende të BE-së. Nuk shoh problem territorial. I takon Kosovës të shtyjë përpara dhe të bindë pjesën tjetër për pozicionin e saj të konsoliduar,” – tha Rama.
Ai shtoi se për suksesin e saj, Kosova duhet të zbatojë të gjitha pikat e dialogut të ndërmjetësuar nga BE-ja dhe të lërë Serbinë dhe Evropën të përballen me sfidat e tyre:
“Që të jetë e suksesshme, Kosova duhet të harrojë Serbinë dhe të realizojë të gjitha pikat e dialogut. T’ia lënë topin në fushë Serbisë, të lënë Evropën të merret me Serbinë, dhe jo të shndërrohet kjo çështje në fajësim të tyre.”
Ky qëndrim vjen në një kohë kur procesi i dialogut Kosovë-Serbi është në fokus të diskutimeve ndërkombëtare, dhe kur Bashkimi Europian kërkon përparim të prekshëm në implementimin e marrëveshjeve të mëparshme.
