Kryeministri Edi Rama deklaroi sot nga Londra, ku merr pjesë në panelin e Chatham House me temën “Ballkani Perëndimor dhe Bashkimi Europian”, se Shqipëria pranon anëtarësimin në BE pa të drejtë vetoje, duke shtuar se procesi i integrimit nuk mund të jetë “gjithçka ose asgjë” për sa kohë vendi është vetëm kandidat.
Mesazhi kryesor i Ramës
Rama theksoi rëndësinë e një qasjeje të balancuar ndaj integrimit:
“Procesi s’mund të jetë gjithçka ose asgjë. Sa kohë je vetëm kandidat nuk ke asgjë. Nga kjo shtysë që ne bëmë, ia dolëm të gjejmë vesh që na dëgjuan për të pasur para shtesë për të financuar reformat.”
Ai shtoi se BE-ja ka sfida të brendshme për sa i përket konsensusit mes vendeve të mëdha dhe frustrimeve që lindin rreth vendimmarrjes:
“Kur të na shihni ne do thonë ‘Oh Zot, kemi më shumë nga ata që sjellin telashe’, dhe në fund thua ‘jo, jo’. Pastaj vendimi ka veto, kanë të drejtë jo për veton, por për faktin që janë kaq të frustruar.”
Sipas Ramës, marrja e statusit të plotë anëtarësimi me të drejta të kufizuara për veto është e mirëpritur, por do të jetë e kushtëzuar nga reforma e brendshme e BE-së:
“Marrja jonë si anëtar me një status ndryshe është e mirëpritur, pa të drejtë vetoje, votimi për sa kohë BE do të reformojë veten. Kjo reformë ka qenë kryefjalë për kaq shumë dekada.”
Rama nënvizoi gjithashtu se Shqipëria do të jetë pjesë e vendimmarrjes së BE-së me një rol konstruktiv, duke ndjekur linjat e reformave dhe duke marrë pjesë në sukseset e Bashkimit Europian.
