Kryetari i Partisë Socialiste, Edi Rama, ka folur për mediat para nisjes së mbledhjes së Asamblesë së PS-së, duke mohuar planifikime për ndryshime të reja, por duke theksuar se ka synim një riorganizim për të përmirësuar punën e partisë.

Rama tha: “Për t’iu thënë që është mbledhje pune, raportimesh lidhur me hapat e tjerë që do të ndiqen në funksion të objektivit për ta bërë gati PS për fitoren e radhës. PS është në një proces të rëndësishëm dhe jemi shumë të vetëdijshëm që është më e nevojshme se asnjëherë më parë një hapje e madhe e partisë dhe një përfshirje sa më të gjerë për të gjithë ata që kanë dëshirën dhe nevojën e brendshme që të kontribuojnë.”

Megjithatë, kreu i qeverisë theksoi se nuk ka ndryshime të parapara dhe se fjalën “ndëshkim” nuk e sheh si pjesë të organizmit të një familje politike. Ai insistoi në riorganizim dhe lëvizje në funksion të punës së përgjithshme të partisë. Gjithashtu, Rama refuzoi të përgjigjet për akuzat e ministrisë së Financave, Arben Ahmetajt.