Kryetari i Partisë së Lirisë, Ilir Meta ka akuzuar kryeministrin Rama se “po u pi gjakun fëmijëve shqiptarë”, duke gjetur gjithmonë “fatkeqësi”, sipas tij, për të justifikuar gjendjen e vendit.

Teksa e quajti një klloun më të papërgjegjshëm në Shqipëri, Meta theksoi se kreut të qeverisë i dalin sondazhet mirë pasi i bën vetë.

Ilir Meta: “Ky po u pi gjakun fëmijëve të Shqipërisë. Tani ka filluar thotë fajin e ka Putin. Si t’ia bëjmë që çmimi i naftës është shumë më i lirë në Ukrainë se në Shqipëri. Lufta ndikon tek ne, e drejtë, po në Kosovë nuk ndikon.

Kujt do që t’ia hedhë? Nxjerr përherë nga një fatkeqësi! Bomba na ka rënë për sa kohë të kemi ty, çfarë fatkeqësie më të madhe mund të ketë ky vend.

Je peng dhe vasalëve të qarqeve më antishqiptare. Ke vënë në diskutim shtetin e Kosovës, integritetin e Shqipërisë.

Është në një panik të madh, sondazhet i dalin mirë sepse i bën vetë. Ku të gjejë Shqipëria një klloun më të papërgjegjshëm se sa ty. Është koha të bashkohemi të gjithë shqiptarët pa dallime partiake e politike, ka vetëm një ndarje sot themelore dhe ekzistenciale ajo midis shqiptarëve dhe patronazhistëve.

Sepse patronazhistët një pjesë e të cilëve janë shumë të palumtur, jo vetëm për pagat që u jepen, por e kuptojnë edhe ata që kështu nuk vazhdohet më sepse kanë fituar urrejtjen e qytetarëve, Është betejë midis lirisë dhe dinjitet, e frikës dhe pasigurisë. Do e fitojë beteja e dinjitetit të shqiptarëve.

Vendin tonë e shpëton vetëm demokracia. Partia e lirisë është e vendosur për të zbatuar referendumin që popullin e ka në Kushtetutë, që të mos dalë më sistemi demokratik jashtë loje dhe bashkë me të gjithë populli dhe të kapet shteti nga një bandë, siç është kapur nga sekti i Rilindjes. 2/3 e popullsisë nën kufirin e varfërisë. Mësuesit më të keq paguarit e Shqipërisë.”