Kryeministri Edi Rama deklaroi sot se rritja e pensioneve do të jetë një nga shtyllat kryesore të mandatit të katërt të qeverisë, ndërsa fondet për këtë reformë janë tashmë të parashikuara në projektbuxhetin afatmesëm.

Në episodin e gjashtë të podkastit “Flasim – Zëdhënës malesh”, Rama tha se qeveria ka vendosur objektiva “të qarta dhe ambicioze” për rritjen e pensioneve, të shpallura që para zgjedhjeve.

Sipas tij, synimi është që pensioni mesatar i plotë në zonat urbane të arrijë në 400 euro, ndërsa ai në zonat rurale të shkojë në 180 euro.

Rama theksoi se kjo reformë ecën paralel me rritjen e pagave, e cila do të hyjë në fuqi në janar të vitit të ardhshëm.

Ai rikujtoi se paga minimale, si në sektorin publik ashtu edhe në atë privat, do të jetë jo më pak se 500 euro, duke garantuar se askush në Shqipëri nuk do të paguhet nën këtë nivel.

“Kjo rritje e pensioneve dhe pagave synon të përmirësojë standardin e jetesës dhe të forcojë mbështetjen sociale për vitet në vijim,” u shpreh kryeministri.