Bazuar në raportin vjetor të Ministrisë së Financave, numri i kontratave të koncesioneve/PPP të miratuara në Shqipëri deri në vitin 2023 është 230, ndërkaq 6 prej tyre janë zbatuar. Si rezultat, numri aktual i kontratave aktive të koncesionit/PPP është 224.

Në periudhën 2004-2013 janë lidhur në total 176 kontrata, ndërsa në periudhën 2014-2023 janë miratuar 54 kontrata koncesionare/PPP.

Autoriteti Kontraktues kryesor është Ministria e Infrastrukturës dhe Energjisë me 208 kontrata, ndërsa Ministria e Turizmit dhe Ministria e Financave kanë nga 6 kontrata. Ministria e Shëndetësisë dhe Mbrojtjes Sociale është Autoritet Kontraktues në 4 kontrata në fushën e shëndetësisë.

Sektori i energjisë ka 183 kontrata me një vlerë totale prej 415.2 miliardë lekësh, ndërsa sektori i transportit ka 21 kontrata me vlerë totale 123.8 miliardë lekë. Sektori i mjedisit ka 6 kontrata me vlerë 25.8 miliardë lekë, ndërsa sektori i shëndetësisë ka 4 kontrata me vlerë prej 4.2 miliardë lekësh.

Në kategorinë ‘Të tjera’, janë përfshirë 10 kontrata koncesionare me vlerë 11.3 miliardë lekë të shpërndara në sektorin e bujqësisë, kontrollin fiskal, zhvillimin ekonomik dhe urban.

Në total janë lidhur 15 kontrata koncesionare/PPP me mbështetje buxhetore, ndërsa kontratat pa mbështetje buxhetore janë 209. Pagesat buxhetore për vitin 2023 kanë rezultuar rreth 2.3% të të ardhurave tatimore të vitit paraardhës buxhetor, nën kufirin maksimal të rregullit fiskal prej 5%. Ky tregues parashikohet të jetë në rënie edhe për vitet në vijim nën kufirin maksimal të rregullit fiskal.