Në Britaninë e Madhe, një burrë dhe pesë të tjerë po përballen me akuza të shumta për përdhunim dhe abuzim seksual ndaj një gruaje për më shumë se 13 vjet. Sipas mediave ndërkombëtare dhe policisë së Wiltshire, gjashtë burrat janë akuzuar për mbi 60 krime seksuale kundër një gruaje të vetme, ish-gruas së njërit prej tyre.

Philip Young, 49 vjeç, nga Swindon dhe ish-burri i viktimës, akuzohet për 56 krime seksuale, përfshirë drogimin e ish-gruas së tij për ta detyruar të kryente marrëdhënie seksuale me burra të tjerë. Ai përballet gjithashtu me akuza për posedim të pornografisë me fëmijë. Viktima, 48-vjeçarja Joanne Young, ka lejuar publikimin e emrit të saj, duke hequr dorë nga e drejta ligjore për anonimitet.

Abuzimet kanë ndodhur midis viteve 2010 dhe 2023. Pesë të tjerët, të moshës 31 deri në 61 vjeç, akuzohen për përdhunim dhe u liruan me kusht, ndërsa ish-bashkëshorti i saj qëndron në paraburgim. Të gjithë priten të paraqiten për seancën dëgjimore nesër në Gjykatën e Kurorës Swindon.

Rasti ka ngjashmëri me atë të francezes Gisèle Pelicot, e cila u abuzua për rreth dhjetë vjet nga bashkëshorti dhe disa bashkëpunëtorë, për të cilin u dhanë disa dënime, duke përfshirë një burgim 20-vjeçar për autorin kryesor Dominique Pelicot. Ky rast vlerësohet si një nga më të rëndët për abuzim të vazhdueshëm seksual në Britani.