Ambasada e Shteteve të Bashkuara të Amerikës ka reaguar një ditë pas incidentit të ndodhur në Kuvendin e Shqipërisë, ku deputetët e opozitës bllokuan foltoren dhe dogjën karriget në hyrje të Parlamentit. SHBA ka shprehur shqetësimin e saj për shfaqjen e forcës dhe shkatërrimit në institucionin ligjvënës shqiptar, duke theksuar nevojën për vetëpërmbajtje dhe dialog konstruktiv mes palëve.

Në një postim në rrjetin social X (ish-Twitter), Ambasada e SHBA-së deklaroi se akte të tilla dhune dhe potencialisht të rrezikshme nuk kanë vend në procesin demokratik. Mesazhi i ambasadës nënvizoi rëndësinë e vetëpërmbajtjes dhe bashkëpunimit, duke nxitur të gjitha palët që të angazhohen në dialog të frytshëm dhe të respektojnë normat e qytetarisë.

“Ambasada e SHBA është thellësisht e shqetësuar për shkatërrimin dhe forcën e shpalosur në parlamentin shqiptar të hënën. Akte të tilla dëmtuese dhe potencialisht lënduese nuk kanë vend në procesin demokratik. Nxisim të gjitha palët e përfshira të ushtrojnë vetëpërmbajtje, të angazhohen në dialog konstruktiv si dhe të përqafojnë vlerat e respektit dhe qytetarisë,” theksoi Ambasada.

Ambasada gjithashtu ripërsëriti mbështetjen e saj për procesin e integrimit të Shqipërisë në Bashkimin Europian dhe u zotua të vazhdojë të mbështesë institucionet shqiptare në përpjekjet e tyre për afrimin e vendit me komunitetin euro-atlantik.