Këngëtarja Ronela Hajati ka bërë reagimin e saj të parë, pas skualifikimit të Shqipërisë nga Eurovizion, pa prekur natën finale.

Ronela shprehet se edhe nëse do të kishte shkuar në finale, do të kishte qenë në renditje e fundit, duke aluduar në këtë mënyrë me skemën e votimit në Eurovizion, ku më së shumti shtetet votojnë për fqinjët e tyre.

“Edhe sikur të isha në finale do të isha e fundit! E di! Por sasia e dashurisë që kam marrë është e madhe! Unë fitova Eurovizionin sepse fitova turmën! Dhe turma ka gjithmonë të drejtë! JU DUA”, shkruan Ronela në postimin e saj në rrjetet sociale.

Mbi këngëtaren gjatë 24 orëve të fundit ka pasur një boom komentesh negative, kryesisht për tansformimin që pësoi kënga, për mungesën e tekstit, apo dhe për performancën e Ronelës në skenë.

Këngëtarja shqiptare vendosi që të guxojë qoftë me veshjen, qoftë me koreografinë, vendim ky i cili duket se nuk u përkrah nga shumica e publikut shqiptar.

E siç është zakon në raste të tilla, rrjeti kryqëzoi këngëtaren edhe për peshën e saj, që në fakt do të ishte faktori i fundit që ndikonte në performancën e saj.