Në një intervistë të hapur në programin “Rudina” në Tv Klan, këngëtari Redon Makashi ka ndarë me publikun sfidat që po përballet familja e tij, duke zbuluar se babai i tij po lufton me sëmundjen e demencës.

I pyetur nga Rudina Magjistari nëse prindërit e tij e vizitojnë studion, Redon shprehu trishtim për gjendjen e të atin: “Janë këto sëmundjet që nuk kanë shërim… Është pak e vështirë sepse është hera e parë që përballem me një situatë të rëndë direkt, nga një qetësi totale, nga një jetë normale e qetë kur s’ke çfarë bën”.

Ai theksoi se sfida më e madhe bie mbi nënën e tij, znj. Drita, e cila është “në frontin e parë” për t’i ofruar mbështetje të atit, ndërsa ai përpiqet të ndihmojë nga larg.

“Kalojmë një moment shumë të vështirë. Babai nuk mund të vijë në studio dhe ka 8 muaj që po bën luftë me jetën,” shtoi këngëtari, duke theksuar ndikimin e madh emocional që ka kjo situatë për të dhe për familjen e tij.

Redon Makashi u shpreh se përballja me demencën është një sfidë e gjatë dhe pa fund, duke nënvizuar rëndësinë e mbështetjes dhe përkushtimit të të afërmve në kujdesin e të sëmurit.