Një nga projektet më të bujshme të viteve të fundit në Nju Jork, ndërtimi i një kazinoje luksoze në zemër të Times Square, ka marrë dritë të kuqe nga komisioni përgjegjës për shqyrtimin e licencave të reja të kazinove.

Propozimi prej 5,4 miliardë dollarësh, i mbështetur nga Caesars Entertainment dhe kompania e Jay-Z, Roc Nation, u rrëzua me katër vota kundër dhe vetëm dy pro.

Kundërshtimi më i fortë erdhi nga komuniteti i Broadway-t, i cili paralajmëroi se një kazino në zonë do të rrezikonte identitetin kulturor dhe turistik të Manhattanit.
“Një kazino mund të ndërtohet kudo, por Broadway ekziston vetëm këtu. Ky vendim mbron magjinë e lagjes sonë,” – deklaroi Jason Laks, president i Broadway League.

Projekti parashikonte ndërtimin e një kompleksi me kazino moderne, hotel luksoz dhe restorante, por kundërshtarët e shihnin si kërcënim për teatrin dhe bizneset lokale.

Megjithatë, plani kishte edhe përkrahës të fortë, mes tyre aktivisti i njohur për të drejtat civile Al Sharpton.

Propozimi për Times Square ishte një nga tetë projektet konkurrente, mes të cilave përfshiheshin edhe zona pranë OKB-së, Queens dhe Bronx.
Në dispozicion janë vetëm tre licenca, ndërsa fituesit do të duhet të paguajnë të paktën 500 milionë dollarë secili për të marrë të drejtën e operimit.