Djali i Shahut të fundit të Iranit, Reza Pahlavi, ka reaguar pas ndërhyrjes ushtarake të Shteteve të Bashkuara dhe Izraelit ndaj objektivave të regjimit iranian. Në një postim të gjatë në rrjetet sociale, Pahlavi thekson se ndihma e dhënë nga presidenti Donald Trump është mbërritur, por fitorja përfundimtare do të arrihet nga populli i Iranit.
“Të dashur bashkëkombës të mi, momente vendimtare na presin. Ndihma që Presidenti i SHBA-ve premtoi popullit të guximshëm të Iranit ka mbërritur. Objektivi i saj është Republika Islamike, aparati i saj i shtypjes dhe makina e saj vrasëse, jo vendi i madh i Iranit dhe populli i tij. Megjithatë, fitorja përfundimtare do të arrihet prapëseprapë nga ne,” shkruan Pahlavi.
Ai i bëri thirrje ushtrisë dhe forcave të sigurisë iraniane të mbrojnë popullin dhe jo regjimin, duke theksuar se tranzicioni i qëndrueshëm është i mundur vetëm me bashkëpunimin e qytetarëve. Pahlavi i kërkoi gjithashtu Shteteve të Bashkuara të sigurojnë mbrojtjen e civilëve dhe të ruajnë jetën e bashkatdhetarëve të tij.
“Populli i Iranit është aleati juaj natyror dhe aleati i botës së lirë, dhe ata nuk do ta harrojnë ndihmën tuaj gjatë periudhës më të vështirë të historisë së Iranit. Për momentin, qëndroni në shtëpitë tuaja dhe ruani qetësinë. Jemi shumë afër fitores përfundimtare,” përfundoi Pahlavi.
Deklarata e tij ngre tensionin politik dhe ushtarak në rajon dhe pasqyron përpjekjet e opozitës iraniane jashtë vendit për të mobilizuar popullin kundër regjimit aktual.
