Furnizimi me energji elektrike është rikthyer pjesërisht në qendrën e Madridit, pas një ndërprerjeje të gjerë që përfshiu pjesën më të madhe të Gadishullit Iberik dhe zgjati rreth tetë orë.

Ndërprerja masive la miliona banorë pa energji, duke shkaktuar ndërprerje serioze në sistemin e transportit, telekomunikacionit dhe shërbimeve bazë. Autoritetet spanjolle shpallën gjendjen e jashtëzakonshme në disa rajone, përfshirë Madridin, Andaluzinë dhe Ekstremadurën, për të koordinuar më mirë përgjigjen ndaj krizës.

Ministria e Brendshme sqaroi se gjendja e jashtëzakonshme do të aplikohet vetëm në ato rajone që kërkojnë mbështetjen e qeverisë qendrore për të marrë nën kontroll funksionet publike kritike.

Nga ana tjetër, Kryeministri Pedro Sánchez deklaroi se ndërprerja mund të jetë shkaktuar nga një “oscilacion i fortë” në rrjetin elektrik kombëtar, por nënvizoi se hetimet për të përcaktuar shkaqet e sakta janë ende në zhvillim.

Rikthimi i energjisë në disa zona të Madridit përbën një hap të rëndësishëm drejt normalizimit të situatës, megjithatë autoritetet paralajmërojnë se rivendosja e plotë e furnizimit në gjithë vendin mund të kërkojë kohë.