Këngëtarja Rina Balaj ka zbuluar në një intervistë të fundit raportin e saj të veçantë me reperin Fero, me të cilin ka realizuar disa bashkëpunime të suksesshme që u kthyen në hite në skenën muzikore shqiptare.

Artistja theksoi se mes tyre ka ekzistuar gjithmonë respekt dhe afërsi, pavarësisht ndryshimeve në karrierë dhe jetën personale:

“Unë me Feron mund të them lirisht se jemi rritur bashkë. Kemi qenë shumë të rinj kur kemi filluar të punojmë. Ka qenë gjithmonë shumë i sjellshëm me mua, por edhe me shoqet e mia, që janë të gjitha vajza.”

Rina shtoi se gjatë viteve ata kanë ruajtur një mbështetje të ndërsjellë dhe një komunikim të shëndetshëm, duke ndarë këshilla dhe duke ruajtur raportin e mirë edhe pse nuk kanë qenë në të njëjtin label muzikor. Ajo e përshkoi reperin si një figurë familjare dhe të besueshme:

“Feron e shoh si vëllain tim, si Rigonin.”

Kur u pyet për procesin gjyqësor ku Fero akuzohet nga ish-bashkëshortja e tij, Rina preferoi të mos komentojë:

“Nuk mund të gjykoj për diçka që nuk e kam parë vetë.”

Raporti i tyre artistik dhe personal duket se ka mbetur i fortë dhe i bazuar mbi respektin dhe mbështetjen reciproke, duke treguar një lidhje që shkon përtej muzikës.