Afati kalimtar i verës parashikohet sfidues për Manchester City, që do të duhet të bëjë maksimumin për ta mbajtur në skuadër mesfushorin kyç, Rodri.

Sipas raportimeve nga mediumi gjerman Bild, 29-vjeçari spanjoll ka tërhequr interes serioz nga dy gjigantët e La Ligas, Real Madrid dhe Barcelona, të cilët janë të gatshëm të paraqesin oferta të rëndësishme financiare për ta bindur që të largohet nga “Etihad Stadium”.

Rodri ka qenë një figurë kyçe në mesfushën e Cityt gjatë viteve të fundit, duke kontribuar në sukseset e klubit anglez. Kontrata e tij është e vlefshme deri më 30 qershor 2027, duke i dhënë Manchester City një pozitë të fortë negociuese.

Megjithatë, me interesimin në rritje nga Spanja, klubi mund të detyrohet të ofrojë kushte më të mira për ta mbajtur mesfushorin, ndërsa spekulimet për një rikthim të mundshëm të Rodrit në La Liga po shtohen dita-ditës.