Rruga nacionale Herbel–Peshkopi, pjesë e Rrugës së Arbrit, është përfshirë nga një rrëshqitje skarpate gjatë orëve të natës, duke sjellë bllokimin e një korsie të qarkullimit. Balta dhe inertet kanë përfunduar në asfalt, duke e bërë kalimin të vështirë dhe të rrezikshëm për mjetet që lëvizin në të dy drejtimet.

Pavarësisht investimeve të konsiderueshme të kryera në këtë segment rrugor, problematika e rrëshqitjeve përsëritet pothuajse pas çdo episodi reshjesh shiu. Kjo situatë ka krijuar shqetësim te drejtuesit e mjeteve, pasi qarkullimi drejt Tiranës dhe nga Tirana në drejtim të Peshkopisë vijon me vështirësi të theksuara.

Në vendngjarje ndodhet Policia Rrugore, e cila po orienton trafikun dhe u bën thirrje drejtuesve të mjeteve të lëvizin me kujdes të shtuar. Megjithatë, mungesa e tabelave paralajmëruese për bllokimin e njërës korsi rrit rrezikun për aksidente, veçanërisht gjatë orëve të natës dhe në kushte të dobëta shikueshmërie.

Ende nuk ka një njoftim zyrtar për ndërhyrjen e mjeteve të pastrimit apo për kohën e normalizimit të plotë të qarkullimit në këtë segment të rëndësishëm rrugor.