Bashkia Elbasan ka reaguar lidhur me situatën në rrugën e fshatit Tudan, e cila ka pësuar rrëshqitje të konsiderueshme dherash si pasojë e reshjeve intensive gjatë periudhës nëntor 2025 – shkurt 2026.

Sipas bashkisë, problematika është evidentuar që në fillim të muajit janar, kur Agjencia e Shërbimeve Publike dhe Emergjencat Civile u njoftua për bllokimin e një segmenti rrugor që lidh fshatin. Ekipet kanë ndërhyrë disa herë për pastrimin e aksit, por rrëshqitjet janë përsëritur vazhdimisht, duke e bërë situatën të rrezikshme edhe për vetë punonjësit, çka ka sjellë tërheqjen e përkohshme të mjeteve.

Në këto kushte, më 16 janar, bashkia i është drejtuar për vlerësim Shërbimi Gjeologjik Shqiptar. Pas inspektimit në terren, ekspertët kanë theksuar nevojën për një studim të thelluar gjeologo-inxhinierik për të përcaktuar ndërhyrjen e duhur.

Nga vlerësimi paraprak rekomandohet që ndërhyrjet kryesore të kryhen gjatë verës, kur terreni të jetë tharë plotësisht. Këto përfshijnë stabilizimin e ujërave sipërfaqësorë – një proces që ka nisur me vendosjen e tubacioneve – si dhe pastrimin e rrugës të shoqëruar me ndërtimin e një muri mbrojtës në pjesën e sipërme.

Bashkia thekson se, pavarësisht situatës në këtë segment, fshati Tudan nuk është i izoluar. Banorët kanë akses përmes dy rrugëve alternative, ndërsa aksi që e lidh me qendrën e njësisë administrative dhe shërbimet bazë vijon të jetë plotësisht funksional.