Sipas Departamentit për Mjedisin, Ushqimin dhe Çështjet Rurale (Defra), në vitin 2023 rreth pesë milionë vape-s (cigaret elektronike) njëpërdorimëshe hidheshin në mbeturina çdo javë, duke sjellë një problem serioz për menaxhimin e mbetjeve dhe mjedisin. Një nga sfidat kryesore që lidhet me këto pajisje është prania e baterive litium-jon, të cilat, kur hidhen në mbeturinat shtëpiake, mund të shkaktojnë qindra zjarre në kamionët e koshave dhe qendrat e përpunimit të mbetjeve çdo vit.

Përveç baterive, vape-t përmbajnë edhe pllaka qarku, të cilat, nëse nuk hidhen siç duhet, mund të çlirojnë përbërës toksikë si kobalti dhe bakri në mjedis gjatë shpërbërjes së tyre. Këto minerale, si dhe litiumi, nëse rikuperohen në mënyrë të duhur, mund të ripërdoren për prodhimin e teknologjive të gjelbra, si bateritë për automjetet elektrike apo për turbinat e erës.

Në vitin 2022, sasia e vape-s së hedhur në kosh përmbante më shumë se 40 tonë litium, mjaftueshëm për të fuqizuar 5000 automjete elektrike. Megjithatë, sfida qëndron në riciklimin e këtyre pajisjeve, pasi për shkak të madhësisë dhe mënyrës së prodhimit të tyre, procesi i shpërbërjes është i vështirë dhe kompleks. Kjo tregon për nevojën urgjente të krijimit të metodave më të mira për menaxhimin dhe riciklimin e vape-ve, për të minimizuar dëmet e tyre mjedisore.