Anëtari i Kryesisë së Parisë Demokratike, Eno Bozdo ka reaguar për vendimin e ERE-s për rritjen e çmimit të energjisë elektrike.

Përmes një mesazhi në ‘Facebook’, ai u shpreh se OSHEE që prej gati 3 javësh ka refuzuar kërkesat e kryefamiljarëve për të patur matës së energjisë elektrike më vete. Sipas Bozdos, bëhet fjale për ato familje që jetojnë në banesa të përbashkëta dhe që nuk kanë një matës më vete dhe janë të detyruar të ndajnë faturat me personat e tjerë që jetojnë në atë godinë.

Mes të tjerash demokrati thekson se me ndryshimin e ri ne fashën e konsumit të energjisë elektrike, këta qytetarë do të përballen me fatura marramendëse. Po ashtu Bozdo i bëri thirrje qytetarëve që të marrin pjesë në protestën e 12 nëntorit.

Reagimi i Eno Bozdo:
“Prej 3 javësh tashmë, OSHEE refuzon kërkesat e kryefamiljarëve për të pasur matës më vete të energjisë elektrike.
Bëhet fjalë për ato familje që jetojnë në banesa të përbashkëta dhe që për momentin kanë vetëm një matës. Deri më sot kjo nuk sillte asnjë ndryshim sa kohë çmimi energjisë ishte i njëtrajtshëm, pavarësisht konsumit.

Por tani që çmimi rritet mbi 4 herë mbi fashën 800 këh në muaj, është në të drejtën e familjeve të keni matës të veçantë për çdo familje. Sepse ndryshe do të paguajnë 4-fishin e asaj që u takon.
Pikërisht këtë të drejtë, prej 3 javësh, OSSHE po e refuzon në mënyrë arbitrare.
OSHEE e refuzon sepse kërkon të paguhet padrejtësisht, për të rritur arkëtimet.
Tipike për OSHEE, kompania më e korruptuar publike, të cilës ne sot i paguajmë jo pak por 50% të çmimit të energjisë.
Është absurde dhe e turpshme që përveç çmimit shumë të lartë, shqiptarët të paguajnë edhe hajdutërinë e rradhës.
Shqipëria është në rrezik, për sa kohë Rama dhe hajdutët e tij vazhdojnë e qeverisin në këtë mënyrë.