Kreu i shërbimit rus të sigurisë FSB, Alexander Bortnikov, akuzoi Ukrainën dhe Perëndimin për rekrutimin e të rinjve rusë për të organizuar sulme të armatosura.
“Në kushtet e Rusisë që kryen operacionin ushtarak special, forcat speciale ukrainase dhe kuratorët e tyre perëndimorë kanë nisur një indoktrinim ideologjik agresiv dhe rekrutim të qytetarëve tanë”, tha Bortnikov në një takim në Moskë të Komitetit Kombëtar Anti-Terrorizëm.
“Sidomos brezin e ri, për t’i përfshirë në aktivitete sabotuese, terroriste dhe ekstremiste,” shtoi ai.
Më 2 prill, një bloger i famshëm ushtarak rus Vladlen Tatarsky u vra në një shpërthim në një kafene në Shën Petersburg pasi një 26-vjeçare i dha atij një bust që më vonë shpërtheu, duke plagosur më shumë se 40 të tjerë.
Ndërsa dihet pak për sulmin, Rusia ka fajësuar Ukrainën dhe tha se ishte orkestruar me ndihmën e mbështetësve të kritikut të burgosur Alexey Navalny.
