Presidenti ukrainas Volodymyr Zelensky njoftoi në një postim në Telegram se forcat ruse kanë përdorur gjatë javës së kaluar rreth 550 dronë sulmues, pothuajse 60 raketa të llojeve të ndryshme, dhe më shumë se 660 bomba ajrore për të sulmuar Ukrainën. Ai po ashtu njoftoi se forcat e mbrojtjes ukrainase kanë rrëzuar 33 raketa, përfshirë ato balistike, dhe 311 dronë sulmues në qiellin ukrainas.

Zelensky theksoi se shumë dronë të tjerë, të përdorur në sulmet përditshme ndaj infrastrukturës, nuk kishin arritur objektivat e tyre, ndërsa kërkoi më shumë sisteme mbrojtëse Patriot për të siguruar jetët e qytetarëve dhe për të forcuar mbrojtjen kundër sulmeve të tilla. Ai shtoi se më shumë aftësi me rreze të gjatë do të ofronte më shumë mundësi për ndalimin e sulmeve dhe përfundimin e luftës ruse.