Rusia ka ndërmarrë një seri sulmesh me raketa mbi kryeqytetin e Ukrainës, Kiev, duke shkaktuar dy të vdekur dhe dhjetëra të plagosur. Bombardimet shkaktuan një valë të madhe tymi dhe flakësh mbi qytetin, ndërsa raketat goditën disa zona të banuara, përfshirë ambasadën shqiptare.

Zëdhënësi i Departamentit të Shtetit të Shteteve të Bashkuara, Matthew Miller, në një postim në rrjetin social ‘X’, ka dënuar sulmin dhe ka shprehur shqetësim për pasojat që ai ka shkaktuar. Ai theksoi se sulmi me raketa ka rezultuar në vdekjen e një civili dhe ka dëmtuar një ndërtesë që përmban misione diplomatike, përfshirë ato të Shqipërisë dhe shteteve të tjera.

“Shtetet e Bashkuara dënojnë sulmin me raketa të Rusisë ndaj Kievit sot, që vrau një civil dhe dëmtoi një ndërtesë ku priten disa misione diplomatike, duke përfshirë objektet e partnerëve tanë Shqipërinë, Argjentinën, Çekinë, Malin e Zi, Maqedoninë e Veriut dhe Portugalinë,” ka shkruar Miller.